God wil Sy beeld in jou herstel wat deur die sondeval vertroebel is, en jou voorberei en bekwaam vir jou hemelse burgerskap, taak en leierskap in Sy Koninkryk.

Baie ware weergebore kinders van die Here ondervind ook patrone van geestelike neerlaag, sielsontevredenheid, frustrasie, gebrek aan lewensvreugde, onvervuldheid, onsekerheid, ongelukkigheid, neerslagtigheid, depressie, minderwaarigheid of meerderwaardigheid, ‘n gevoel van verwerping, swak selfbeeld, allerlei bindinge en soortgelyke simptome. Waarom is dit so? Hierdie dinge is alles simptome van die sondeval en wanneer ons hiermee worstel wil die Here ons lei om te soek na ‘n oplossing wat ons slegs in Hom en Sy doel vir ons lewens sal vind. Ons het in Deel 1 gesê dat tensy jy AL DRIE bogenoemde Goddelike doelwitte deelagtig word sal jy ‘n onvervulde en onvoltooide mens sterf, want God het jou so gemaak dat jy ware vervulling en voltooiïng slegs binne God se volledige doel en plan vir jou lewe sal vind! 

Wedergeboorte is slegs die eerste en fundamentele stap van God se doel en plan vir jou lewe, maar dit stop nie daar nie! Met wedergeboorte kom maak die Heilige Gees woning in jou gees en maak Hy jou gees lewend met die doel om nou Sy werk in en deur jou lewe te volbring. Die taak van die Heilige Gees is nie met wedergeboorte voltooi nie –– dit is slegs die begin! Net soos ‘n baba nie fisies volwasse gebore word en dadelik sy lewensdoel verstaan nie, sal jy dit ook nie alles verstaan by wedergeboorte nie. 

Daar is natuurlik besliste voordele van kindwees. ‘n Kind ondervind spesiale liefde en versorging van sy ouers. ‘n Kind leef onbesorg en gelukkig in sy ouershuis, terwyl hy of sy hulself geniet met hulle eie speelgoed. So is dit ook op geestelike gebied. Dit is egter maklik om te glo dat kindskap nou die einde van God se doel en plan vir jou lewe is. Die gevaar is dat jy nooit tot geestelike volwassenheid kom nie omdat jy nie besef dat die Here ‘n groter doel en plan vir jou lewe het nie.

Soos ‘n baba groei tot volwassenheid en dan uit sy of haar ouerhuis gaan om ‘n onafhanklike doelgerigte lewe te begin, so is dit ook in die geestelike realm. Dit kan en behoort net baie vinniger te gebeur in die geestelike lewe.

Die Bybel leer dat die mens na die beeld van God geskape is. In watter opsig het die beeld van God verlore gegaan met die sondeval? Wat is dit wat God in jou en my wil herstel wat deur die sondeval vertroebel is? Die antwoord is, ons karakters en persoonlikhede! Die Here wil ons karakters en persoonlikhede na die beeld van God herstel. Ons het in Deel 1 gesê dat hierdie ons sielsdimensie is en bestaan uit ons WIL, INTELLEK en EMOSIE.

‘n Waarheid wat die mens se natuurlike verstand net nie wil aanvaar nie, is die feit dat elke sielkundige probleem onder die son se oorsprong lê by die sondeval! God het vir Adam en Eva volmaak geskape na die beeld van God. Elkeen van hierdie simptome wat ons hier bo genoem het, geestelike neerlaag, sielsontevredenheid, gebrek aan lewensvreugde, onvervuldheid, onsekerheid, ongelukkigheid, verwerping, depressie, bindinge, en voeg maar hier by elke ander moontlike menslike en sielkundige probleem en afwyking waaraan jy kan dink, het sy oorsprong by die sondeval!

Die gay-debat is ‘n goeie voorbeeld om hierdie punt te illustreer. Mense redeneer daaroor of gays so gebore word of so word as gevolg van hulle omstandighede. Ek het onlangs ‘n verhaal gelees van ‘n homoseksuele man wat tot geloof gekom het en sy verhaal vertel van hoe (hy glo) dit in sy ouerhuis begin het en die stryd wat hy gevoer het, en steeds voer tot na sy huwelik. Uit sy verhaal is dit duidelik dat hierdie man glo dat hy gay geword het as gevolg van sy omstandighede.

Die feit van die saak is egter, hy is so gebore! Hy het die gay-gene van Adam en Eva oorgeêrf met geboorte, al het dit eers tot uiting gekom met volwassenheid! Tensy hy hierdie waarheid aanvaar sal hy met sy probleem worstel tot die dood toe! (Alternatiewelik, sal hy sy ‘probleem’ 'ont-probleem' deur dit eenvoudig as ‘normale’ menslike gedrag te aanvaar wat nie verander kan word nie en die res van die samelewing dienooreenkomstig wil oortuig –– soos dit tans in die wêreld en ook in sommige kerke gebeur.)

Word ‘n dief, egbreker, leuenaar, of moordenaar so gebore of het omstandighede hulle so gemaak? Hulle met 'n humeur, of hulle wat in opstand is of was teen hulle ouers en oneerbiedig teenoor hulle is of was –– is hulle so gebore of het hulle so geword as gevolg van omstandighede? Meeste mense sal sê, omstandighede het hulle so gemaak. Dis my pa of ma of hierdie of daardie een se skuld. Jy sien, hierdie is juis die kern van sonde –– die feit dat ons altyd die oorsaak vir ons probleem buite onsself soek. Die mens soek altyd die oorsaak vir sy probleem by sy omstandighede of by iemand anders! Dit is die karakter van die sondeval! Onthou jy hoe Eva die skuld vir die slang gegee het en Adam die skuld vir Eva gegee het?

Die feit van die saak is, ons is almal so gebore! Ons het almal ‘n sonde-besmette natuur van Adam en Eva oorgeêrf met geboorte al kom dit eers tot uiting met volwassenheid! Word iemand met 'n emosionele probleem, woede, hiper-sensitiwiteit, een of ander fobie, verwerping, depressie, 'n swak selfbeeld, ‘n verhoudingsprobleem, ’n negatiewe of onrein gedagtewêreld, gewetenswroeging, haat- en wraakgevoelens, onvergewensgesindheid, pornografiese-, dwelm- of drankverslawing, so gebore of het hulle so geword weens omstandighede? Die feit van die saak is, hulle is met daardie sondige geneigdheid gebore! Ons het almal die sonde-gene van Adam en Eva oorgeêrf met geboorte, wat ookal ons besondere probleem is, al kom dit eers tot uiting met volwassenheid! 

Hiermee ontken ons nie dat omstandighede ‘n wesenlike rol speel in hoe mense ontwikkel nie –– net soos blootstelling aan fisiese bakterieë, virusse en kieme ‘n invloed het op ‘n mens se fisiese gesondheid. Of hierdie bakterieë, virusse en kieme ‘n langtermyn of kroniese gevolg in jou liggaam het hang egter af of jy vatbaar daarvoor is of nie. Dit hang af hoe jou liggaam daarop reageer. Hierdie ‘vatbaarheid’ is iets wat jy oorgeêrf het van jou ouers en word deur die wetenskap genetika genoem. Net soos jy ‘vatbaar’ is vir sekere geneties oordraagbare siektes as gevolg van jou genetika, net so is alle mense ’vatbaar’ vir sekere sondige en sielkundige afwykings as gevolg van ons sondige ‘genetika’. Die probleem lê by ons sondige ‘genetika’ of natuur wat ons van Adam en Eva oorgeêrf het.

Die ‘genetika’ van sonde verduidelik

Ons bely in die kerk dat elke baba by geboorte in sonde ontvang en gebore word. Tog glo ons dit nie wanneer daardie baba groot word en in sonde verval nie! Hoekom nie? Want ons het ‘n gebrekkige sondebegrip. Wat is sonde? Jy sien, sonde het twee dimensies. Daar is die ‘daad’ van sonde, waarmee ons almal goed bekend is, maar dan is daar ook die ‘saad’ van sonde –– die sondige natuur. Die saad van sonde lei tot die daad van sonde. Dit is belangrik dat ons hierdie twee fasette van sonde sal onderskei.

Sonde is soos manlike saad wat bevrug word, of landbousaad wat ontkiem. Ons lees byvoorbeeld in Gen 3:15: “En Ek sal vyandskap stel tussen jou en die vrou, en tussen jou saad en haar saad. ...”. ‘Jou saad’, is die saad of nageslag van die duiwel wat sonde-besmette saad is; teenoor ‘haar saad’, wat ten diepste ‘n verwysing is na die Messias wat uit Eva se nageslag sou voortkom, en almal wat uit die saad van die Messias gebore sou word. Die genetiese manipulasie van landbousaad wys vir ons hoe genetika in die landbou werk.

Ons lees ook van die twee soorte saad in Jesus se gelykenis van die saaier in Mat 13:27-38: “En die diensknegte van die huisheer het gekom en vir hom gesê: Meneer, het u dan nie goeie saad in u land gesaai nie? Waar kry dit dan die onkruid vandaan? En hy antwoord hulle: ‘n Vyandige mens het dit gedoen. ... En Hy het geantwoord en vir hulle gesê: Hy wat die goeie saad saai, is die Seun van die mens, ... Die goeie saad—dit is die kinders van die koninkryk, en die onkruid is die kinders van die Bose, en die vyand wat dit gesaai het, is die duiwel...” .

Die wetenskap help ons om die oorêrflikheid van sonde beter te verstaan. Ek lees die volgende beskrywing van genetika op die webblad van Psychology Today: “All traits and personality characteristics, from height to fear of heights, are driven by a complex interplay of genes and environmental feedback. We now know that the lion's share of human genes are expressed in the brain and that almost all normal and disordered behaviors are polygenic, meaning that they are influenced (not to say caused) by multiple genes. Scientists are therefore tasked with a massive but increasingly plausible mission: mapping the pathway from genes and mediating forces to the person you see in the mirror ...” (Beklemtoning my eie.)

Indien die wetenskaplikes daarin sou slaag om hierdie “pathway” te “map” tot by sy beginpunt, sal hulle by Adam en Eva en die sondeval uitkom! (Sien o.a. Dr Nathaniel Jeanson se boek, Traced! -- Human DNS points to Adam.)

Ons DNA en die Bybelse sondebegrip

DNA is die menslike liggaam se ‘handleiding’ wat jou maak wie jy is. Jy kry een helfte van jou DNA van jou vader en een helfte van jou moeder. DNA maak voorsiening vir die oordrag van genetiese materiaal van een geslag na ‘n ander. Jou DNA bepaal watter fisiese sowel as sielkundige eienskappe jy van jou ouers oorêrf. Jou DNA bepaal ook of jy vatbaar is vir sekere geneties-oordraagbare siektes sowel as sielkundige afwykings, Die wonder van hierdie kennis is dat alhoewel die wetenskap dit eers in die 20ste eeu ontdek het, het die Bybel dit reeds bykans 3,000 jaar gelede beskryf. Dawid skryf in die Psalms: “Afvallig is die goddelose mense van die geboorte af; die leuensprekers dwaal van die moederskoot af.” (Psa 58:3.) In Psa 51:5 sê Dawid: “Kyk, in ongeregtigheid is ek gebore, en in sonde het my moeder my ontvang.”  Alhoewel Dawid niks van DNA of genetika geweet het nie, het hy die effek daarvan akkuraat beskryf. 

Wat ons moet verstaan is dat ons sondige natuur gekoppel is aan ons natuurlike, fisiese lewe, of vlees, soos die Bybel dit noem, wat ons van ons ouers oorgêrf het. (Lees gerus Rom 7: 5, 18, 25; Rom 8: 1, 3, 4, 6, 7, 8, 13; Rom 13: 14; 2 Kor 10: 3; Gal 2: 20; Gal 5: 13, 16, 17, 19, 24; Gal 6: 8; Ef 2: 3.) Die woord ‘vlees’ word in die Bybel in meer as een konteks gebruik, maar verwys altyd na die liggaamlike, menslike, of fisiese lewe. Wanneer ons die woordjie ‘vlees’, (‘sarx’ in die Grieks), bestudeer in die verband van bogenoemde verse, kom ons tot die gevolgtrekking dat die betekenis daarvan beskryf kan word as ”die menslike natuur (karakter en persoonlikheid) soos gedryf deur sy oorgeêrfde, sonde-besmette, natuurlike of fisiese lewe” –– in kort, ‘sondige natuur’. Sommige Bybelvertalings het inderdaad op sekere plekke die woordjie ‘vlees’ met ‘sondige natuur’ vertaal.

Die twee lewensbronne en hulle nature

Kom ons vat nou saam. Ons het hierbo verduidelik dat daar twee lewensbonne is –– fisiese sowel as geestelike lewe. Teenoor die vleeslike of fisiese lewe met sy sondige natuur, staan die geestelike lewe waarvan die bron die inwonende Heilige Gees is. Ons het vroeër gesê dat elkeen van ons ‘n dormante of dooie gees oorgeêrf het met geboorte. Ons kan baie van die geestelike lewe leer deur eenvoudig fisiese lewe te bestudeer. So het ons dan ook hierbo fisiese geboorte met geestelike geboorte vergelyk. Net soos elke mens ‘n sonde-besmette DNA oorêrf met fisiese geboorte –– wat in sy ‘vlees’ of fisiese lewe gesetel is, net so êrf ‘n kind van die Here ‘n rein en suiwer geestelike lewe en ‘DNA’ van God oor met wedergeboorte –– wat in sy gees gesetel is!

Laat ons nou eers kortliks die INTELLEK en EMOSIE van nader bekyk.

Die Intellek is die kognitiewe deel en die Emosie die gevoelsdeel van ons sielsdimensie. Ons Intellek en Emosie bestaan uit ons Gedagtewêreld, Rede, Gewete, Verbeelding, Geheue, Onderbewussyn, Selfbeeld, Waardesisteem, Gemoed of Emosie, en ons Disposisie.
‍
Wat belangrik is om te verstaan is dat elkeen van hierdie terreine van ons sielsdimensie besmet is deur die sondesaad van Adam en onder die beheer van ons oorgeêrfde sondige natuur staan. God wil hierdie terreine herskep na Sy beeld. Hy wil dat ons sal dink, redeneer, droom, onthou, oor onsself dink, moraliseer, voel en reageer soos God. Die Bybel noem dit heiligmaking. Heiligmaking is die proses waarvolgens die Here ons gevalle karakters en persoonlikhede herskep na Sy beeld.

Ons kan dus nou verstaan dat vir God om ons karakter en persoonlikheid na Sy beeld te herskep, moet die terreine van ons Wil, Intellek en Emosie onder die beheer van die geestelike lewe – die inwonende Heilige Gees, kom. 

Die vraag waarmee Christene egter worstel is, kom die mens se sielsdimensie, sy Wil, Intellek en Emosie dan nie outomaties onder die beheer van die Heilige Gees met wedergeboorte nie?

Ons het net-nou gesê, net soos elke mens ‘n sonde-besmette DNA oorêrf met fisiese geboorte, net so êrf ‘n kind van die Here die rein en suiwer geestelike ‘DNA’ van God oor met wedergeboorte! Dit is egter presies hier waar die weergebore kind van die Here nou met ‘n dilemma sit –– hy besit twee nature! Hy het ‘n nuwe Goddelike natuur wat in sy gees gesetel is, maar hy sit ook nog met sy ou sondige natuur wat hy van Adam oorgeêrf het in sy sielsdimensie, naamlik sy Wil, Intellek en Emosie. 

Paulus beskryf hierdie dilemma van die Christen se twee nature meesterlik in Romeine 7:14-24: “Want ons weet dat die wet geestelik is, maar ek is vleeslik, verkoop onder die sonde. Want wat ek doen, weet ek nie; want wat ek wil, dit doen ek nie, maar wat ek haat, dit doen ek. ... Want ek weet dat in my, dit wil sê in my vlees, niks goeds woon nie; want om te wil, is by my aanwesig, maar om goed te doen, dit vind ek nie. Want die goeie wat ek wil, doen ek nie, maar die kwaad wat ek nie wil nie, dit doen ek. ... Ek vind dus hierdie wet: as ek die goeie wil doen, is die kwaad by my aanwesig. Want ek verlustig my in die wet van God na die innerlike mens; maar ek sien ‘n ander wet in my lede wat stryd voer teen die wet van my gemoed en my gevange neem onder die wet van die sonde wat in my lede is. Ek, ellendige mens! Wie sal my verlos van die liggaam van hierdie dood?” (Beklemtoning my eie. Die oorspronklike woord wat hier as “lede” vertaal word beteken, ‘’n deel of dele van die liggaam’.)

In Gal 5:17 beskryf Paulus dit so: “want die vlees begeer teen die Gees, en die Gees teen die vlees; en hulle staan teenoor mekaar, sodat julle nie kan doen wat julle wil nie.” (Beklemtoning my eie.)

Dit wat Paulus hierbo beskryf is die oorsaak van ‘n doellose lewe, elke sielkundige stryd, geestelike neerlaag, sielsontevredenheid, gebrek aan lewensvreugde, onvervuldheid, patrone van onsekerheid, ongelukkigheid, neerslagtigheid en depressie, minderwaarigheid of meerderwaardigheid, ‘n swak selfbeeld, verwerping, aggressie en onbeteulde humeur, onvergewensgesindheid, verdeeldheid in die huis en in die kerk, huweliksverbrokkeling, gesinsverbrokkeling, emosionele bindinge, seksuele- homoseksuele en pornografiese bindinge, en elke ander simptoom waaraan jy kan dink –– in die lewens van weergebore Christene!

Is daar ‘n oplossing vir hierdie stryd? Verseker! Sou Jesus Christus aan die Kruis gesterf het om die Christen in ‘n doellose lewe en ‘n verlore stryd teen sy sondige natuur te dompel vir die res van sy aardse lewe? Nooit! Ons het hierbo Paulus se woorde aangehaal in Rom 7:14-24. In vers 24 vra hy die vraag, “Wie sal my verlos van die liggaam van hierdie dood?” In vers 25 beantwoord hy sy eie vraag: “Ek dank God deur Jesus Christus, onse Here!”, en dan beskryf hy die probleem: “So dien ek self dan wel met die gemoed die wet van God, maar met die vlees die wet van die sonde.” (Beklemtoning my eie.) 

In Romeine 8 gee hy die oplossing. Voor ons egter by die oplossing uitkom, gaan ons eers die derde doelwit van God vir jou lewe behandel, want die oplossing vir beide doelwitte is dieselfde. 

Die Here wil jou toerus en bekragtig om Hom hier op aarde te verteenwoordig en Sy instrument te wees deur Sy skeppingsdoel te help uitvoer deur jou getuienis en medewerking in Sy plan en doel vir die wêreld, in afwagting van Jesus Christus se wederkoms. Ons het by Doelwit 1 gesê dat een van die ses belangrikste kenmerke van ‘n weergebore kind van God is ‘n passie om die Evangelie te deel en andere vir Jesus te wen –– om ‘n getuie vir Jesus te wees. Iemand wat oor geestelike lewe beskik het ‘n passie om geestelike lewe in andere te verwek.

Een van die belangrikste kenmerke van fisiese lewe is die drang om voort te plant. Die wêreld noem dit die seksdrang. Dit is daardie begeerte om seksueel intiem met jou huweliksmaat te wees. Seksuele omgang is die hoogtepunt van die liefde tussen ‘n man en vrou. Daarom trou mense en het hulle kinders. Die huwelik en huisgesin is ‘n Goddelike instelling en daarom moet ‘n liefdesverhouding tussen ‘n man en ‘n vrou op ‘n Bybelse fondament staan en lei tot ‘n Godgesentreerde huwelik. Enige liefdesverhouding tussen jou en iemand van die teenoorgestelde geslag wat nie in harmonie met die Woord van God is en nie lei tot ‘n Godgesentreerde huwelik nie, is BUITE die wil van God vir jou lewe! Toe God vir Adam en Eva geskep het, het Hy vir hulle die opdrag gegee, “wees vrugbaar en vermeerder en vul die aarde” (Gen 1:28.) Soos ons reeds in Deel 1 beskryf het, wil God ‘n nageslag verwek na Sy beeld –– en dit is God se primêre doel vir die huwelik!. 

Die rede waarom God homoseksualiteit haat en gay-huwelike teen Sy wil is, is omdat dit teenstrydig is met Sy skeppingsdoel vir die mens! God wil ‘n nageslag hê na Sy beeld! Die huwelik is in die eerste plek ingestel ter wille van God –– nie die mens se plesier en bevrediging nie! Dit beteken nie dat die huwelik ook vir die mens se vreugde bedoel is nie, maar wanneer die mens die gawes van God primêr vir sy eie doel en begeertes gebruik, is die gevolg op die langtermyn ALTYD hartseer, lyding, stryd, onvrede, mislukking, en vernietiging. Dit is God se wil dat die mens sy vervulling en lewensvreugde binne God se doel en plan vir sy lewe sal vind. As jou huwelik nie voldoen aan God se primêre doel vir die huwelik nie, of as jy jou huwelik primêr in stand hou vir jou en jou huweliksmaat se geluk en bevrediging, sal jy nooit volkome huweliksgeluk vind nie! Laat ons herhaal wat ons nou al ‘n paar maal gesê het: “tensy jy AL DRIE bogenoemde Goddelike doelwitte deelagtig word sal jy ‘n onvervulde en onvoltooide mens sterf, want God het jou so gemaak dat jy ware vervulling en voltooiïng slegs binne God se volledige doel en plan vir jou lewe sal vind!”

Laat ons egter terugkeer na die passie om geestelike lewe te verwek. Jy sal onthou dat ons gesê het dat Adam en Eva voor die sondeval beide fisiese en geestelike lewe gehad het, maar dat met die sondeval hulle gees dormant geword het en hulle hul geestelike lewe verloor het. Jesus Christus het die vloek van die sondeval vernietig aan die kruis; en deur Sy opstanding, hemelvaart en die uitstorting van die Heilige Gees, het Hy die weg gebaan vir die verwekking en herlewing van geestelike lewe in elke mens wat Hom in geloof aanneem.

Deur die inwonende Heilige Gees is God besig om vir Hom ‘n geestelike nageslag na Sy beeld te verwek, en Hy doen dit deur Sy kinders. Dit is God se wil en plan vir jou lewe dat jy geestelik vrugbaar sal wees! Dit is God se wil en plan vir jou lewe dat jy geestelik sal reproduseer! Die hoogtepunt van die liefde vir God –– die liefde tussen ‘n weergebore kind van God en Jesus Christus, is geestelike voortplanting! Die onvermydelike gevolg van geestelike gemeenskap tussen ‘n kind van God en Jesus Christus is geestelike vrugbaarheid. Die resultaat moet noodwendig wees –– geestelike kinders! Hoeveel geestelike kinders het jy al vir God verwek? Of, watter bydrae het jy al gelewer tot die bevolking van die hemel?

Han 1:8: "... maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judéa en Samaría en tot aan die uiterste van die aarde."

Hy wil hê dat jy deur jou leefstyl en kommunikasie met mense in jou familie-, sosiale-, werks-, en digitale omgewing, ‘n geestelike en hemelse doelgerigte lewe sal uitstraal en deel, wat ander sal lei na dieselfde ervaring as jy. Om ‘n effektiewe getuie vir Jesus te wees moet ’n mens natuurlik ’n getuienis en lewe van geestelike en hemelse doelgerigtheid hê. Het jy so ‘n getuienis en leef jy dit uit ter uitbreiding van Sy Koninkryk?

Mat 4:19: "En Hy sê vir hulle: Kom agter My aan, en Ek sal julle vissers van mense maak.."

Hy wil jou beroep, jou opleiding en jou vaardighede gebruik vir Sy doel. Hy wil jou beroep verander in ‘n roeping. Die Here het ‘n spesiale roeping vir elke Christen en ook vir jou! Hy het ‘n spesiale taak vir jou wat net jy kan vervul! Is jy tot Sy beskikking wanneer Hy jou sou roep?

Miskien sê jy, maar ek het geen spesiale roeping van God ontvang nie. Dit mag wees dat jy reeds in die area van God se roeping vir jou lewe funksioneer maar jy erken dit nie as sulks nie; of Sy roeping mag nog in die toekoms kom. Die Here sal egter nie Sy roeping vir jou openbaar totdat jy gereed is om dit te ontvang nie. Die waarheid om hier te verstaan is dat dit van primêre belang is om te weet dat jy binne die wil van God vir jou werk en beroep staan.

Gen 1:27,28: "En God het die mens geskape na sy beeld; na die beeld van God het Hy hom geskape; man en vrou het Hy hulle geskape. 28  En God het hulle geseën, en God het vir hulle gesê: Wees vrugbaar en vermeerder en vul die aarde, ..."
‍
Hy wil jou huwelik gebruik as ‘n standaard en voorbeeld vir jou kinders en die wêreld om die hemel te help bevolk. Ons het hierbo reeds heelwat oor die huwelik gesê. Die vraag is, is Jesus Christus Here van jou liefdesverhouding of jou huwelik? Is jou liefdesverhouding of jou huwelik in harmonie met die Woord van God, en tot beskikking van die Here om die hemel te bevolk? Dit gaan nie hier primêr oor ‘n fisiese nageslag nie, maar ‘n geestelike nageslag. Uit die aard van die saak sluit dit ons kinders in en is hulle ons eerste geestelike verantwoordelikheid.

Tensy jou huwelik die model en standaard van die Bybel weerspieël, sal jou huwelik onvervuld wees. Tensy albei van julle in die eerste plek onvoorwaardelik aan Jesus Christus en die gesag van Sy Woord onderworpe is, sal die Here julle huwelik nie seën en gebruik vir Sy doel nie. As julle wil hê dat die Here julle huwelik moet seën, maak seker dat julle huwelik op elke terrein, ook wat die Goddelike gesagstruktuur binne die huwelik en gesin aanbetref, aan die gesag van Sy Woord onderwerp is!

Luk 1:13-17: "Maar die engel sê vir hom: Moenie vrees nie, Sagaría, want jou gebed is verhoor, en jou vrou Elisabet sal vir jou ‘n seun baar, en jy moet hom Johannes noem. 14  En hy sal blydskap en verheuging vir jou wees, en baie sal oor sy geboorte bly wees; 15  want hy sal groot wees voor die Here ... 16  En hy sal baie van die kinders van Israel bekeer tot die Here hulle God. 17  En hy sal voor Hom uit gaan in die gees en die krag van Elía, om die harte van die vaders terug te bring tot die kinders en die ongehoorsames tot die gesindheid van die regverdiges, om vir die Here ‘n toegeruste volk te berei."

Dit is die Here se doel en plan vir elke vader en moeder om ons kinders op te voed in die vrese van die Here –– maar meer as dit, dat ons kinders hul Goddelike doel en roeping sal verstaan! Dit is die Here se doel en plan vir ons lewens dat ons, ons kinders sal opvoed in die doel en plan van God vir hulle lewens. Ons moet ons kinders dus van kleins af leer wat dit beteken om die wil van God vir hulle lewens te soek. 

Hierdie proses begin by ‘n baie belangrike punt, en dit is om ons kinders weg te gee aan die Here met geboorte. Daar moet geen twyfel by ons kinders wees nie –– elkeen van hulle is met hul geboorte aan die Here toegewy en weggegee! Dit beteken dat ons alle reg aan die Here oorgedra het om ons kinders vir Sy doel te gebruik. Ons het ons eie ideale vir ons kinders oorgedra aan die Here en vervang met Sy ideale vir hulle lewens. Dit beteken dat hulle Sy eiendom is om deur Hom gebruik te word vir Sy doel soos Hy wil. Hulle is ‘verbondskinders’!

Dit beteken egter nie dat hulle van geboorte af gered is nie. Elkeen van hulle moet nog steeds weer gebore word en afgesonder word vir God se doel vir hulle lewens deur ‘n keuse van hulle eie vrye wil. Maar hulle moet weet dat hoe langer hulle neem om by daardie plek te kom waar hulle hulself onvoorwaardelik tot Sy beskikking stel, hoe pynliker sal die gevolge wees – want ter wille van ons as ouers se verbond met Hom, sal die Here hulle nie uitlos nie!

Mat 25:14,15: "Want dit is soos ‘n man wat op reis wou gaan en sy diensknegte roep en aan hulle sy besittings toevertrou. 15 En aan die een gee hy vyf talente en aan die ander twee en aan die ander een, aan elkeen na sy vermoë; en hy het dadelik op reis gegaan."

Elke mens op aarde het sekere talente en gawes van God ontvang met geboorte –– sommige meer en ander minder –– maar elke mens op aarde het ‘n talent! Daardie talente en gawes behoort aan God en hy het dit aan jou geleen om te ontwikkel, aan te wend en te gebruik vir Sy doel en tot Sy eer!  Kan ek vir jou ‘n onfeilbare formule vir ‘n mislukte lewensdoel gee? Hier is dit: ‘gebruik en wend jou talente en gawes hoofsaaklik vir jou eie doel en jou eie lewensbehoeftes en plesier aan’. Aan die einde van jou lewe sal jy saam met Salomo in Pred 1:14 getuig: “Ek het alles wat in hierdie wêreld gebeur, bekyk: alles kom tot niks, dit is 'n gejaag na wind.” 

2 Kor 9:6-8: "Maar dink daaraan: Wie spaarsaamlik saai, sal ook spaarsaamlik maai; en wie volop saai, sal ook volop maai. 7  Laat elkeen gee soos hy hom in sy hart voorneem, nie met droefheid of uit dwang nie, want God het ‘n blymoedige gewer lief. 8  En God het mag om alle genade oorvloedig oor julle te laat wees, sodat julle altyd in alle opsigte volop kan hê en oorvloedig kan wees tot elke goeie werk."

Dieselfde wat ons hierbo met betrekking tot jou talente en gawes gesê het, geld ook vir jou geld en besittings. As jy ‘n kind van die Here is, behoort dit nie aan jou nie! Jy kan nie daarmee maak wat jy wil nie. Dit is deur God aan jou geleen vir Sy doel! Jy is slegs die rentmeester of bestuurder daarvan. Wees verseker, net soos in Jesus se gelykenis in Matteus 25 van die tien talente, sal Hy van jou rekenskap eis vir die wyse waarop jy Sy finansiële gawes bestuur het.

Kol 4:2,5: "Volhard in die gebed en waak daarin met danksegging; ... 5  Wandel in wysheid teenoor die wat buite is, en koop die tyd uit."

Wat hierbo geld vir jou talente, gawes, geld en besittings, geld ook vir jou tyd. Hoeveel tyd sou jy graag wou hê dat God moet bestee om Homself aan jou te openbaar, jou te beskerm, jou te lei, jou te dra deur beproewing, en jou en jou gesin te lei en seën? Maak seker dat die antwoord op hierdie vraag nie meer is as die tyd wat jy gewillig is om in Sy teenwoordigheid en vir Sy doel op aarde af te sonder nie!  Is die tyd wat jy aan God gee beperk tot ‘n Sondag erediens? Moet dan nie verbaas wees as dit die enigste tyd is wat Hy vir jou het nie! 

Die vraag is nou, hoe kan ons die Here se doel en plan vir ons lewens deelagtig word en uitleef?  Menslik gesproke is dit onmoontlik! Geen mens kan in menslike krag so ‘n lewe lei nie, en die rede waarom meeste Christene daarin misluk is omdat hulle probeer om dit in menslike krag, met hulle natuurlike lewe en vermoëns te doen.  

Die antwoord is om met die Heilige Gees vervul te word! Liewe vriend, jy moet met die Heilige Gees vervul word! Geen mens kan ‘n Goddelike doelgerigte lewe lei sonder om met die Heilige Gees vervul te wees nie. Geen mens kan so ‘n lewe lei nie – dit is slegs die Heilige Gees wat dit deur jou kan leef! Daarom het Jesus in Han 1:8 gesê: “Julle sal krag ontvang wanneer die Heilige Gees oor julle kom ...” en in Ef 5:8 lees ons: “Moenie dronk word van wyn nie—daarin is losbandigheid; maar word met die Gees vervul.” Die geheim van ‘n oorwinnende, oorvloedige geestelike lewe is ‘n Geesvervulde en Geesbeheerde lewe. 

Die Heilige Gees wil jou vul met Goddelike krag en passie. Die Heilige Gees wil aan jou ‘n oorwinnende lewe skenk –– oorwinning oor jou sondige natuur en sondige patrone, oorwinning oor jou denke en jou emosies, oorwinning oor jou intellektuele en emosionele stryd, oorwinning oor die wêreld en jou omstandighede, oorwinning oor jou sielkundige probleme, oorwinning in jou huwelik en gesinslewe, oorwinning in jou werk en werksomstandighede, oorwinning in jou verhoudinge. Die Heilige Gees wil  aan jou ‘n lewe van geestelike krag gee. Hy wil aan jou krag gee om Sy getuie te wees, krag om te dien, krag om heilig te lewe, krag om sonde te oorwin, krag om te vergewe, krag om versoeking te oorwin!

Liewe vriend, ‘n Heilige Geesvervulde en –beheerde lewe is die enigste lewe wat die moeite werd is om te lewe! Dit is die enigste lewe wat jou nie êrens op jou pad by ‘n doodloopstraat sal uitbring nie! Dit is die enigste manier om God se hemelse doel en plan vir jou lewe deelagtig te word en daarin te wandel! Elke ander pad sal jou by ‘n doodloopstraat uitbring –– indien nie nou nie, op jou sterfbed! Salomo was die rykste, slimste en welvarendste man in die wêreld van sy tyd en dit is hoe hy sy lewe aan die einde daarvan beskryf het: “Ek was magtiger en ryker as almal voor my in Jerusalem. ... Alles wat ek begeer het, het ek my veroorloof; ek het my geen plesier ontsê nie. Alles waarmee ek my besig gehou het, het my plesier verskaf. Dit was my beloning vir al my inspanning. Maar toe ek goed nadink oor alles wat ek gedoen het en oor alles waarmee ek my met soveel sorg besig gehou het, het ek gesien dat alles niks was, 'n gejaag na wind. In hierdie wêreld bevredig niks nie.” (ANV. Pred 2:9-11) Jy wil tog nie so eindig op jou lewenspad nie, wil jy?

Die vraag is nou, wat wil jy? Wil jy met die Heilige Gees vervul word? Ons het vroeër gesê dat ons sielsdimensie bestaan uit ons Wil, Intellek en Emosie. Dit is belangrik dat ons die funksie van ons Wil mooi sal verstaan.

Wat presies is die WIL? Jou Wil is daardie eienskap waarmee God jou geskape het wat jou ‘n soewereine persoon maak. Jy het al baie gehoor dat God soewerein is. Wat beteken dit? John Piper beskryf God se soewereiniteit soos volg: “God’s sovereignty is his right and power to do all that he decides to do.” Dit beteken dat God Sy eie besluite maak, onafhanklik dink en voel, en deur niks en niemand anders gemanipuleer of beïnvloed word nie. Net so het God die mens na Sy beeld as ‘n soewereine wese geskep. Dit beteken dat die mens sy eie besluite maak, onafhanklik dink en voel, en dat die mens nie deur God gemanipuleer word soos ‘n pop in ‘n poppespel nie. Dit is waarom Adam en Eva in sonde geval het sonder dat God dit verhoed het. Met ander woorde, die mens beskik oor die vermoë om vir, of teen God te kies. God wil ‘n nageslag hê na Sy beeld –– nie ‘n klomp poppe nie –– net soos jou eie kinders na jou eie beeld gebore word met ‘n WIL van hul eie. 

Jou WIL is die troonkamer van jou Siel. Jou WIL is die sleutel tot jou sielsdimensie. Met jou WIL kan jy enige deel van jou sielsdimensie oop- of toesluit vir God. Jou WIL is daarom ook die sleutel tot ‘n Heilige Geesbeheerde lewe. Net soos Adam en Eva deur ‘n stap van hulle eie WIL aan God ongehoorsaam geword het, net so soek God nou manne en vroue wat deur ‘n stap van hulle eie WIL hulleself aan God sal oorgee tot ‘n lewe van gehoorsaamheid. Die geheim van heiligmaking, ’n herstelde karakter en persoonlikheid na die beeld van God, die vervulling met die Heilige Gees en ‘n Geesbeheerde lewe behels ‘n vrywillige, algehele en onvoorwaardelike Wilsoorgawe in geloof aan Jesus Christus!

In wese beteken dit dat ek aan die Here volmag gee om Sy Goddelike doel in en deur my lewe te kom vervul. Jesus het hierdie worsteling in die tuin van Getsemane deurgemaak toe Hy gebid het, “nie My wil nie, maar U wil geskied”. So het Jesus ons ook leer bid in Sy bergrede, “... laat U wil geskied”. By implikasie beteken dit dat ons niks sal terughou vir God wat ons nie bereid is om in harmonie met Sy geopenbaarde wil vir ons lewens te bring nie.

Daar is ses fundamentele Bybelse beginsels of waarhede van ‘n oorvloedige, oorwinnende en Geesvervulde lewe. Hierdie waarhede bestaan uit drie fundamentele Bybelse waarhede wat jy moet weet, en drie fundamentele Bybelse waarhede waarop jy moet reageer. Ons het reeds al ses van hierdie waarhede behandel deur die loop van ons bespreking, maar laat ons dit ter wille van duidelikheid weer opsom.

• God het ’n dinamiese plan en ’n hemelse erfenis vir jou van Goddelike doel, geestelike oorvloed, oorwinning, en ’n Geesvervulde lewe.

• Die sondeval, jou eie sonde en jou oorgeêrfde sondige natuur is die enigste rede waarom jy nie God se doel en plan vir jou lewe, die volheid van die Heilige Gees, Sy erfenis, oorvloed, en oorwinning in jou lewe ervaar nie.

• Jesus Christus is God se volkome en enigste voorsiening, en die mens se volkome en enigste oplossing vir die probleem van die sondeval, persoonlike sonde en jou oorgeêrfde sondige natuur.

• Geloof! Ongeveinste geloof in Jesus Christus, Sy kruiswerk (die Evangelie) en Sy Woord (die Bybel), is die sleutel tot ’n Geesvervulde lewe, geestelike oorvloed, oorwinning, en die volheid van Sy erfenis. (Mat 9:29: “Toe raak Hy hulle oë aan en sê: Laat dit vir julle wees volgens julle geloof.”)

• Bekering! Geloof in Jesus Christus, Sy kruiswerk en Sy Woord, behels ’n heelhartige bekering van alle bewuste sonde. Jy moet jou rug draai op elke sonde waarvan die Heilige Gees jou oortuig deur Sy Woord. (Han 3:19: “Kom dan tot inkeer en bekeer julle, sodat julle sondes uitgewis kan word en tye van verkwikking van die aangesig van die Here mag kom,”)

• Algehele oorgawe! Geloof in Jesus Christus en Sy kruiswerk behels ’n sterwe aan jou ou self, of ou mens –– jou ‘vlees’ of sonde-besmette aardse lewe –– en ’n algehele en onvoorwaardelike oorgawe van elke terrein van jou sielsdimensie aan die beheer van Jesus Christus wat deur Sy Gees in jou gees woon. Hierdie is ook die oplossing vir die dilemma van die Christen se twee botsende nature wat ons in Doelwit 2 bespreek het. Sien die illustrasie hieronder. “... Gee julleself aan God as lewende en heilige offers wat vir Hom aanneemlik is. Dit is die wesenlike van die godsdiens wat julle moet beoefen.” (Rom 12:1 – ANV)

Algehele oorgawe is waarskynlik dié Bybelse onderwerp waaroor die meeste verwarring, misverstand en onkunde heers. Dit is waarom so min weergebore Christene waarlik met die Heilige Gees vervul word. Daarom gaan ek ‘n bietjie tyd neem om hierdie onderwerp mooi aan jou te verduidelik.

Algehele oorgawe is ‘n manier om te beskryf hoe ‘n mens jouself, of jou ou mens, of jou sondige natuur, oorgee om saam met Jesus Christus gekruisig te word. Ons praat hier van ‘n geloofsidentifikasie met Jesus Christus en Sy kruiswerk. 

Die geheim van oorwinnende geloof is om jou ten volle met Jesus se plaasvervangende kruisdood en opstanding te vereenselwig en te identifiseer deur geloof. Die geloof waarvan die Bybel praat beteken om jou met Jesus Christus te indentifiseer in Sy dood en opstanding. Die Bybel leer vir ons dat die plaasvervangende offer van Jesus beteken dat jy en ek in Hom was toe Hy gesterf en opgestaan het uit die dood. Hierdie waarheid bly egter slegs ‘n juridiese waarheid vir solank jou geloof passief is. Hierdie waarheid sal slegs realiseer in jou lewe wanneer jy dit vir jouself toe-eien deur aktiewe geloof in algehele oorgawe.